A proposta que se levará a Pleno será para iniciar o procedemento de revisión de oficio de acto nulo do convenio subscrito en 2009 entre o Ministerio de Fomento e o Concello para a transferencia da titularidade da estrada N-120a e da conexión entre a N-120a e a nova N-120.

Aquel convenio asinouse no concello de Monforte o 17 de outubro do ano 2009 no que se asumía a cesión da estrada N-120a por parte do Concello e tamén se asumía a Ronda Urbana que aínda está sen construír. José Tomé asegura que “Feitas as consultas xurídicas sobre a validez deste convenio, todo parece indicar que foi un acto nulo este convenio subscrito entre o Ministerio e o Concello. No Pleno do vindeiro luns iniciaremos o procedemento de revisión de oficio do citado acto nulo”

O Alcalde, na súa comparecencia indicou que “son varios os motivos que nos levan a esta revisión, e a intentar repoñer a legalidade neste asunto, dado que a maior parte da N-120a, non pertence ó casco urbano e polo tanto, non lle debe corresponder ó Concello de Monforte os custes de mantemento igual que non lle corresponde ó resto de Concellos polos que pasa o mantemento da citada estrada”.

Sinala Tomé que a obra tampouco foi concluída na súa totalidade, e que fixera as correspondentes xestións sendo el deputado autonómico. Tomé Roca incidiu en que “o problema de todo isto é que o que se di no convenio é falso. A maior parte desa estrada que corresponde ó termo municipal de Monforte non é urbana, salvo que consideremos urbanos os invernadoiros de Piñeira e unhas casas de Distriz que están ubicadas ó longo da mesma. Así mesmo, o tramo de conexión entre a N-120a, e a nova N-120, é unha vía que non existe, polo tanto non se pode ceder algo que non hai nin sequera neste momento contratado.” 

Proposta ó Pleno e pasos a seguir

No sesión ordinaria da Corporación Municipal de Monforte que se celebrará o 30 de novembro, o Pleno pronunciarase sobre a proposta da Alcaldía baseada nun informe da Secretaría Xeral do Concello, onde establece os seguir para este procedemento de revisión de oficio de acto nulo, como foi a sinatura do Convenio entre o Ministerio e o Concello:

• Iniciar procedemento para a revisión de oficio acordado polo Pleno.
• Notificar o inicio do procedemento ós interesados para que no prazo de 15 días poidan presentar alegacións.
• Dar traslado do expediente, unha vez rematado o trámite de Audiencia, ós servizos municipais para que informen no seu caso sobre as alegacións que se puideran presentar.
• Remitir o expediente á Secretaría tras o informe técnico para que emita o correspondente informe relativo á proposta de resolución que proceda.
• Elevar a proposta a Pleno que de ser aprobado, solicitará dictamen do Consello Consultivo de Galicia, adxuntando a proposta de resolución.
• Recibido o dictamen do Consello Consultivo, dado o carácter preceptivo do mesmo, e elevalo a Pleno para adoptar o acordo definitivo.
• O acordo do Pleno será notificado ós interesados para a tramitación que corresponda.

“A única pretensión que queremos é repoñer a legalidade e que o Concello de Monforte non teña que soportar cargas que non lle corresponden” conclúe o Alcalde.