O delegado territorial da Xunta en Lugo, Javier Arias, participou este venres 11 de decembro, na entrega de diplomas a 20 alumnos/as traballadores que participaron no obradoiro ‘Sarria, Camiño de Santiago‘. Esta acción foi financiada polo Goberno galego con 462.000 euros e que se desenvolveu ao longo dun ano, superando en tres meses a duración prevista inicialmente por mor da pandemia.
Sarria, Camiño de Santiago
Javier Arias clausurou, en compañía doutras personalidades e o alcalde, Claudio Garrido, o obradoiro de emprego Sarria, Camiño de Santiago, promovido polo Concello de Sarria e financiado pola Xunta -inicialmente con 336.400 euros, máis 126.100 euros pola prolongación-.
O obradoiro centrouse nas especialidades de Pavimentos e albanelería de urbanización, e Fábricas de albanelería, cada unha con 10 alumnos/as. Contou con dous monitores, un administrativo e un director.
Nos últimos meses levaron a cabo obras de reforma e adecuación do Camiño de Santiago ao seu paso por Sarria, en elementos como a Escaleira Maior, o muro de peche e a escaleira de acceso ao Campo da Feira, ou o muro do antigo cemiterio; tamén separaron o itinerario rodado e peonil na baixada paralela a este último.
