O obradoiro impartiu formación en Operacións auxiliares de albanelería de fábricas e cubertas, que contou con sete alumnos no municipio de Quiroga, e Operacións auxiliares de acabados ríxidos e urbanización, con seis participantes en Folgoso do Courel e sete en Ribas de Sil. Desenvolveuse ao longo do último ano, superando en máis dun terzo a duración e o orzamento inicialmente previstos co fin de compensar o período en que a actividade estivo suspendida por mor da situación sanitaria.

Estas iniciativas mixtas de formación e emprego buscan mellorar a oportunidades laborais de persoas desempregadas grazas a unha aprendizaxe práctica en especialidades profesionais adaptadas á demanda do mercado de traballo local.

Neste caso, en Quiroga traballaron na segunda fase da ampliación do Museo Xeolóxico, executaron unha beirarrúa e un porche na parte frontal. Ademais, no Museo Etnográfico adaptaron os aseos para que sexan accesibles; tamén realizaron obras en pavimentos e revestimentos na Praza do Albergue, rúa Praia e a Praza Maior.

En Folgoso do Courel remataron a rehabilitación das escolas do Carballal e A Teixera, construíron beirarrúas na rúa Nova e plataformas con valado para os contedores. Por último, en Ribas de Sil levaron a cabo un proxecto de mellora de accesos en San Clodio.