Un dos atractivos da iniciativa dos tres concellos da Comarca de Quiroga, unidos por proxectos comúns como o coñecido Xeoparque Montañas do Courel, é que permite optimizar os recursos públicos. De feito, a Xunta apoia este tipo de solicitudes que favorecen aos municipios rurais, nos que resulta máis necesario xerar oportunidades de emprego que axuden a fixar poboación.

O obradoiro dual Montañas do Courel, inaugurado o pasado 29 de decembro, formará a 20 alumnos na especialidade de Operacións de formigón. Conta cun orzamento de 346.946 euros e terá unha duración de nove meses, durante os cales os participantes aprenderán traballando ao tempo que realizan obras en espazos públicos dos concellos promotores.

En Quiroga traballarán na ampliación do Museo Etnográfico; en Ribas de Sil construirán un cobertizo e mellorarán os accesos á praia fluvial e á zona recreativa de San Clodio; e en Folgoso do Courel acondicionarán un miradoiro no alto do Boi, unha área de estacionamento de caravanas e una alvariza, entre outras tarefas.