Segundo día consecutivo no que a área sanitaria de Lugo supera o cento de casos novos de coronavirus confirmados a través de PCR. Foron 109 contaxios detectados nas últimas 24 horas, segundo información ofrecida polo Servizo Galego de Saúde (Sergas). A cifra ten impacto tamén sobre o total de casos activos, que se sitúan nos 1.361 (88 máis ca onte).
Con todo, o xerente da Eoxi, Ramón Ares, aseguraba este xoves que na última semana e, principalmente nos últimos días a incidencia foi moi importante cun incremento moi alto no número de casos que están aparecendo nos distintos concellos. Preocupa, dí, o concello de Lugo, pero tamén Monforte, Viveiro e Vilalba e “moitos outros concellos”. A situación repercute na presión asistencial dos hospitais da provincia, non só nas camas ordinarias, tamén na UCI. O Hospital Universitario Lucus Augusti conta 19 en planta e nove na UCI; o da Mariña, 18; e o de Monforte mantense con dous ingresados.
Ramón Ares insiste na importancia da responsabilidade individual, evitando as relacións sociais e autoconfinándose, con precaución no propio domicilio; limitando a actividade no exterior ao estrictamente necesario.
