A Garda Civil detivo na localidade lucense de Quiroga a un veciño de San Clodio -no Concello de Ribas de Sil- de 68 anos de idade por ameazar cunha machada e un bastón a unha persoa da que ten orde de afastamento.
Segundo informou o Instituto Armado, por iso este individuo foi detido como presunto autor dun delito de ameazas con arma branca e de quebrantamento de condena.
Os feitos tiveron lugar na localidade de San Clodio cando supostamente este home dirixiuse cara a un veciño “en actitude ameazante”, destacou a Benemérita, e portaba “nunha man unha machada e na outra un bastón”, engadiu.
A persoa detida tiña unha orde xudicial de afastamento en vigor, subliñou a Garda Civil. Por estes feitos, o home foi detido e posto a disposición xudicial.
