O delegado territorial da Xunta, Javier Arias, comprobou días atrás o resultado da actuación acompañado polo alcalde do Concello de Bóveda, José Manuel Arias, e explicou que se investiron máis de 212.000 euros nesta obra.
A rotonda conta cun diámetro interior de 21 metros e un diámetro exterior de 41 metros, con accesos e saídas cun único carril. Os traballos tamén incluíron o acceso ao camiño de servizo existente na marxe esquerda do eixo Lugo-A Pobra do Brollón.
Na saída da glorieta, na dirección Pobra do Brollón, permitirase un xiro á esquerda para acceder á vía existente cara ao parque empresarial de Bóveda.
Neste punto proxectouse un paso de peóns accionado mediante semáforos e a instalación da semaforización correspondente, dando así continuidade a unha rede peonil existente na zona. As obras tamén contemplaron o repintado de marcas viarias e a colocación de nova sinalización vertical, balizamento e defensas, así como a reubicación da farola existente ao centro da glorieta.
