Os populares abordarán, conxuntamente cos integrantes de “Lugo non perdas o tren”, as declaracións realizadas pola dirixente de Adif sobre os investimentos ferroviarios na provincia.
O PP responsabiliza a Isabel Pardo de Vera do cronograma da chegada da alta velocidade a Lugo. “A propia Pardo de Vera participou en distintas reunións con membros do Partido Popular da provincia de Lugo en xaneiro do 2018 xunto ao daquela presidente do ente, Juan Bravo, trasladando o seu compromiso para a conexión da provincia coa alta velocidade tamén á Federación de Veciños de Lugo”, sinalan.
Para os populares o aforro de tempos é algo fundamental; e insisten no aforro de máis de 20 minutos que suporían as variantes de Canaval e Rubián: 11 minutos a dos Peares-Canabal e outros 12 a de Rubián (Bóveda) que representan o 27% do tempo do traxecto. “De executárense estas variantes, a viaxe de Lugo a Ourense quedaría en 60 minutos e, polo tanto, os lucenses estariamos conectados con Madrid en 3 horas e 20 minutos. Pola contra, cos proxectos anunciados este venres, o tempo sería de 4 horas.”
