As investigacións desenvolvidas por axentes do Corpo Nacional de Policía (CNP) permitiron imputarlle a un cidadán romanés de 38 anos de idade, que se atopa en prisión por outros delitos, un total de oito roubos con forza perpetrados na localidade de Monforte de Lemos.
O investigado, que foi detido pola Garda Civil cando foi sorprendido ‘in fraganti’ durante un roubo, está actualmente en prisión por perpetrar 86 roubos con forza nas provincias de León, Zamora, A Coruña e Lugo.
A identificación do suposto autor deses oito roubos en Monforte foi posible tras unha longa investigación por parte dos axentes da Comisaría local que, tras tres roubos con forza perpetrados en locais comerciais da localidade, cun botín que superou os 2.000 euros, puxéronse en contacto coa Garda Civil para coordinar as pescudas, dado que na súa demarcación estaban a producirse delitos similares.
Froito desa colaboración, ambos os corpos lograron situar un mesmo terminal telefónico en todos os roubos e, a posterior investigación dos policías de Monforte, cun “seguimento incansable a través das redes sociais”b, permitiu a identificación do suposto ladrón.
Para determinar a identidade do sospeitoso, tamén se solicitou a colaboración das autoridades romanesas, que “en todo momento” prestaron a súa axuda para esclarecer o caso, aclara a Policía Nacional nun comunicado.
Ao sospeitoso impútanselle oito roubos cometidos en Monforte desde mediados de 2019 ata 2020, sempre co mesmo modus operandi, dado que acudía aos establecementos de día – durante o horario de apertura- para comprobar as medidas de seguridade, e logo asaltábaos pola noite. O botín deses roubos superou os 6.000 euros.
