Un veciño do Saviñao, identificado como A. L.A., aceptou unha multa de 20 meses, a razón de cinco euros diarios que suma 3.000 euros, por un delito de posesión de pornografía infantil.

Este martes houbo acordo entre as partes no xuízo sinalado na Sección Segunda da Audiencia Provincial de Lugo. Previamente a Fiscalía pedía unha pena de tres anos e medio de prisión para este home acusado de distribuír e posuír pornografía infantil. Pero, finalmente, acusou ao procesado da posesión e deixou a posible distribución deste material.

Foi en 2018 cando a Garda Civil topou na casa do agora condenado, nunha parroquia do Saviñao, ata 5.500 arquivos en 722 cartafoles e nunha desas “unha subcarpeta” con imaxes de nenas “espidas” de menos de 16 anos e en poses de “carácter sexual”. En total incautáronse de 3.900 arquivos de pornografía infantil.

Finalmente o acusado aceptou os 20 meses de multa, a razón de cinco euros diarios, e o comiso do computador co contido desas imaxes de nenas menores de 16 anos.

O home limitouse a aceptar os feitos, en tanto que o seu avogado non quixo facer declaracións e pediu que a el o deixasen “en paz”. “A conversación conclúe aquí”, sinalou o letrado aos medios.