A Ribeira Sacra afronta a etapa final para a súa declaración oficial como a sétima Reserva da Biosfera da comunidade por parte da Unesco, aínda que o acto de proclamación, previsto inicialmente para o mes de xuño en Nixeria, aprazarase polo menos ata final de verán.

Así o indicou este domingo a conselleira de Medio Ambiente, Territorio e Vivenda, Ángeles Vázquez, durante unha visita ao miradoiro de Cabo do Mundo, no Saviñao (Lugo), onde puxo en valor o traballo realizado pola Xunta ata o momento, segundo detallou o Goberno galego.

Deste xeito, concretou que permanece pendente a resolución do Comité Internacional de Coordinación do programa Man and Biosphere (MaB), o órgano da Unesco responsable da decisión sobre as candidaturas. Ademais, indicou que o comité do MaB comunicou o adiamento do acto de proclamación, un aspecto abordado nunha reunión telemática na que participou a directora xeral de Patrimonio Natural, Belén do Campo.

Así mesmo, precisou que o territorio da Ribeira Sacra proposto na candidatura comprende 23 municipios de Lugo e Ourense e entrará na repartición dos fondos europeos do Plan de recuperación do Goberno central tras reclamar a Xunta de modo expreso a súa inclusión.

Neste sentido, celebrou que a proposta defendida polo Executivo galego na reunión do comité español do MaB fose apoiada por unanimidade, o que permitirá que a comunidade reciba no período 2021-2023 fondos acordes ao seis reservas da biosfera coas que conta.

Adicionalmente, a conselleira remarcou que o acto de proclamación como Reserva da Biosfera da zona permitirá que o 34% da superficie da comunidade conte con este selo e que o 42% estea protexida por algunha figura de protección.

A titular de Medio Ambiente tamén resaltou que o Goberno galego aspira a que, ademais de contar co título de Xeoparque Montañas do Courel da Unesco, a Ribeira Sacra sexa distinguida como Reserva da Biosfera e Patrimonio Mundial pola mesma organización da ONU.