Segundo sinalan desde o PP, os mestres do coservatorio deron conta da situación que padecen a consecuencia das decisións do alcalde, José Tomé, e que incluen, entre outras medidas, a apertura de varios expedientes por empregar medios propios nas súas clases.
A deputada, Elena Candia, recibiu aos docentes co fin de escoitalos e de buscar solucións que palíen a situación de indefensión na que se atopan. “Lamento profundamente a situación. Nun caso coma este considero que se debe de apostar polo diálogo e non pola imposición”, manifesta a popular.
Os conservatorios en Galicia son de titularidade municipal, como remarcou Candia, pero réxense pola normativa de Educación. Neste senso, Candia comprometeuse a trasladar aos órganos competentes a situación particular de Monforte para que se valore se existe algunha vía de colaboración que poida mellorar o desenvolvemento e funcionamento deste e do resto de centros de formación musical.
Pola súa banda, Katy Varela explicou que xa presentaron o escrito que acordaron cos sindicatos e o resto de grupos da oposición para que Tomé suspenda os expedientes sancionadores e que abra unha mesa de diálogo para elaborar un regulamento común e que se axuste ao que reclaman os docentes. Os populares agardan que o socialista convoque a todas as partes canto antes para procurar unha normativa que regule o funcionamento do centro e abandone “dunha vez por todas a política de enfrontamento”.
