A asociación Segredos de Pantón vai comezar un proxecto para poñer en valor o patrimonio natural do concello.
Nesta nova acción queren localizar árbores ou conxunto delas salientables tanto pola súa historia, como pola súa idade ou dimensións.
A idea é ir incorporando estes elementos, coma poden ser os cipreses da igrexa de San Fiz de Cangas, os plataneiros do Torrón, os piñeiros de Toldaos, o carballo de Cabo de Vila ou o piñeiro da Vila a unha base de datos que sexa accesible para todas e todos os/as interesados/as. De xeito que calquera que queira achegarse a estes elementos naturais poida facelo.
A medida que esta listaxe se vaia confeccionando pensan tamén que incluso se poderá incorporar algunha árbore ao catálogo galego de árbores senlleiras de Galicia.
COMO PARTICIPAR
A xente interesada en participar pode facelo, tras localizar algunha árbore ou conxunto delas, mandando a localización do ben forestal, algunhas fotos, as dimensións aproximadas e incluso a historia que poida saber ao respecto.
A información anterior pode enviarse por whatsApp ao 662 669 223 (Lucas Vázquez), por correo electrónico a segredosdepanton@gmail.com ou tamén comunicándose a través das diferentes redes sociais da entidade (Facebook, Twitter ou Instagram)
Segredos de Pantón facilita tamén un enlace para o mapa en Mymaps de Google para visualizar os exemplares: Patrimonio forestal pantonés
