O Concello de Castro Caldelas e un grupo de cazadores do Tecor ‘Terra de Caldelas’ participan este sábado 29 de maio nunha recollida de lixo polos montes do municipio.
Este colectivo ten localizados vertedoiros incontrolados de residuos sólidos en varias localizacións, algúns deles de difícil acceso, e a súa misión será recoller todo tipo de restos –cascallos, plásticos, electrodomésticos, latas, etc– nunha singular ‘batida’ na que o protagonista non será ningún animal, senón o lixo.
O amoreamento de restos demostra, segundo afirma a alcaldesa, Sara Inés Vega, “unha falta de respecto cara a natureza dalgúns cidadáns“, co cal esta acción pretende concienciar e reivindicar o respecto polo medio ambiente e visibilizar o positivo que pode ser a colaboracion veciñal.
A rexedora trasládalle o agradecemento do concello aos cazadores pola iniciativa e a colaboración neste traballo de limpeza, poñendo en valor ademais que “aparte do propio deporte poden ser un mecanismo de control de especies que beneficia á xenet que se dedica ao mundo rural”.
Para a realización dos traballos o Concello de Castro Caldelas pon a disposición dos cazadores o material e a maquinaria necesarios para levar a cabo as tarefas de limpeza comentadas.
