O Concello de Bóveda e o CEIP Rosalía de Castro puxeron en marcha unha actividade durante o confinamento consistente en que os nenos e nenas mandaran os seus debuxos respondendo á pregunta ‘Cando pase todo isto a que lugar de Bóveda queres ir?’. Cada un deles foi exposto nas redes sociais do Concello nunha galería de imaxes.

Como agradecemento pola súa participacion o Goberno local convidounos a facer unha excursión, que agora veñen de celebrar. Visitaron a Casa do Concello, onde o alcalde, José Manuel Arias, fixo de guía polas dependencias municipais e, de seguido, achegáronse ata a aula forestal Os Trollos onde viron a exposición permanente e coñeceron todos os detalles deste pulmón verde onde medran 115 especies diferentes.

Ao remate, cada un deles puido levar unha árbore para a súa casa para plantalas eles mesmos. Tamén lles deron un folleto coas indicacións para saber facelo.