O colectivo Capitán Gosende organiza en San Clodio de Ribas de Sil a presentación do libro José Darriba Puente, o fillo da Licha. Memoria dun fusilado (1917-1937), unha obra da profesora Alicia Garrido.
O acto terá lugar o vindeiro sábado, 14 de agosto, ás 20:00 horas no salón de actos do concello.
Presentará o acto o 1º tenente de alcalde e concelleiro de Cultura, Roberto Castro, estando a autora acompañada do editor Moisés Barcia, director de Edicións Morgante, e o historiador Manuel Cao.
Con este primeiro ensaio, Alicia Garrido ten por obxectivo rescatar do esquecemento e restaurar a dignidade de José Darriba Puente e a de todos aqueles que, en San Clodio de Ribas de Sil, deron a súa vida ou comprometeron o seu benestar por defenderen a legalidade republicana.
Nunha entrevista que lle fixemos a Garrido en marzo deste 2021, e referíndose aos fusilados, di o seguinte: “é tarefa ineludible recuperar a súa memoria, anular os xuízos farsa, restaurar publicamente a súa dignidade… De non seren atendidas estas reivindicacións, de non ser recoñecido o seu compromiso coa liberdade, estariámolos condenando a morte outra vez”.
