A Irmandade Cultural País do Faro organiza este sábado, 14 de agosto, a presentación de “Alicerces. Revista de estudos do Miño medio. Tomo V”. O acto terá lugar no Círculo Recreativo Cultural (primeiro andar) a partir das 20,30 horas e contará coa intervención do poeta Xulio L. Valcárcel, autor da portada deste número, e do director da Revista, Xosé Méndez Pérez.
Malia o acontecido dende o fatídico marzo de 2020, dende a Irmandade seguen traballando para cumprir co compromiso de editar cada ano un tomo de Alicerces. E así o fixeron.
“Chegar xa a cinco tomos editados e ter prevista xa a edición do Tomo VI para finais de ano é un obxectivo que tiñamos marcado e que puidemos cumprir grazas o esforzo de toda a xente que colabora coa revista. Dende os autores, ata os impresores e, sobre todo, os lectores,” sinalan desde a Irmandade cultural País do Faro.
