O vindeiro 27 de agosto, segunda feira do mes de Quiroga e unha das máis concorridas do ano, celebrarase a I Mostra de Artesanía e Produtos Locais.
O evento chega grazas á iniciativa da Asociación Tarabelada, á que pertencen dous artesáns de Quiroga: Caurelor e Artesanía Armaior e á intermediación de Verónica Núñez –Caurelor– co concello.
Nesta I Mostra de artesáns e produtores locais, que se desenvolverá ao longo da rúa Real, haberá uns 12-14 postos de produtos locais e de artesanía. No apartado de alimentación haberá queixos, marmeladas, mel, licores, repostería, produtos derivados da castaña… e na parte da artesanía poderanse atopar traballos feitos con coiro, xabóns, bixutería, cerámica, teas creativas, tellas ou madeira de oliveira.
Dende o Concello de Quiroga informan que recibiron a proposta con interese e apoiaron a iniciativa para que sexa posible o vindeiro 27 de agosto. Para rematar esta xornada de dinamización local veñen de anunciar que a partir das 21:00 h. terá lugar a actuación do grupo de música folk “A RODA” nas inmediacións da rúa Lago.
COÑECEMOS A ASOCIACIÓN TARABELADA
Para coñecer de quen parte esta iniciativa falamos cun dos socios e encargado de organizar as feiras. Trátase de Flo, un francés que leva 13 anos vivindo nunha aldea de Castro Caldelas, lugar onde arranxou coa súa parella unha casa en ruínas.
Cóntanos que a Asociación Tarabelada naceu no 2012 en Castro Caldelas con fins culturais e medioambientais principalmente. As súas accións van encamiñadas a potenciar e desenvolver: a artesanía, a comercialización de produtos locais, o ecoloxismo e o feminismo.
A primeira feira que organizaron foi en Castro Caldelas, precisamente no ano 2012, e a partir de aquí foron ampliando a iniciativa a outros concellos. Este verán, por exemplo, conta Flo que organizarán un total de 14 feiras en diferentes municipios como: Castro Caldelas, Parada de Sil, A Pobra de Trives, Manzaneda, A Teixeira, Nogueira de Ramuín, Ribas de Sil, Folgoso do Courel e Quiroga.
Tamén sabemos por este dinamizador rural que van ampliando socias e socios e son estes os que tamén colaboran para propoñer nos seus concellos a organización das feiras. Así foi, por exemplo, como Verónica Núñez, de Caurelor, falou con Concello de Quiroga para que se realizara o 27 a I Mostra de Artesanía e Produtos Locais.
Este tipo de eventos, lembra Flo, están enfocados a todos os públicos, xente nova e maior, e tamén para a veciñanza local e as/os visitantes e turistas.
