As Festas Patronais monfortinas non serán, un ano máis, o que acostuman a ser. O Concello de Monforte decidiu non organizar eventos nin actividades paralelas a excepción da misa na honra da Patroa de Monforte, a Virxe de Montserrat, e os tradicionais Fogos de San Vicente.
A misa celebrarase este domingo 15 de agosto ás 11 horas como viña sendo tradicional pero na Igrexa de A Régoa por mor das obras na igrexa de San Vicente. E pola noite, ás 24:00 h., serán os Fogos de San Vicente, tendo unha proxección semellante á de anos anteriores, aínda que terán unha lonxitude no tempo un pouco maior e tamén unha maior intensidade e calidade que en anos precedentes.
Para acudir á celebración relixiosa, a comitiva da Corporación municipal e de autoridades sairá ás 10:45 horas dende o Concello, para recorrer a pé o percorrido ata a igrexa, acompañada polo tradicional grupo de gaitas e tamboriles.
Todos os actos na honra á Patroa celebraranse no interior da Igrexa da Régoa, seguindo a normativa de hixiene e distancias de seguridade establecidas polas autoridades sanitarias, e que suporán unha limitación do aforo e o uso obrigatorio de máscara.
Despois da eucarestía terá lugar, no interior da igrexa, unha ofrenda floral reducida na que depositará frores ante a Virxe unicamente o Alcalde da cidade, José Tomé Roca. A continuación, unha parella de baile tradicional executará dúas pezas tamén diante da Virxe, e dentro do templo.
En diferentes momentos das celebracións relixiosas procederase tamén ao lanzamento de bombas de palenque.
