A vila de Sarria volverá ser escenario, e xa son dezaseis anos, de grandes espectáculos de maxia grazas ao desembarco do 19 ao 22 de agosto dalgúns e algunhas dos/as mellores ilusionistas de Galicia e do Estado.
O evento faise posible grazas a Roberto Lolo, un mago local que tivo a iniciativa da súa organización e que dende os primeiros festivais recibe o apoio incondicional do Concello de Sarria para que se consolide e teña continuidade. Nesta edición cómpre salientar tamén o apoio da Xunta de Galicia e de 60 establecementos locais.
Un total de 15 actuacións distribuiranse entre o xoves 19 e o domingo 22 en diferentes localizacións de Sarria sendo a ‘Gran Gala Final’ na Praza da Vila o último día do festival ás 18:00 h. Nesta actuación estarán Miguel Muñoz, Roberto Lolo, Raymon, Jessica Guloomal, Mago Iago, Celia Muñoz, Jaime Figueroa e Jorge Blass.
Preguntámoslle a Roberto Lolo polas caras novas desta edición e dinos: “vén por primeira vez o campión do mundo Miguel Muñoz; estará a gañadora de Got Talent, a ventrílocua Celia Muñoz; Daniel Sánchez, semifinalista tamén de Got Talent; e un rapaz novo, Magic Mateo”.
No apartado de novos talentos estarán Samuel Moreno, o rapaz Magic Mateo, e Mago Iago que volve por terceiro ano consecutivo “á xente faralle ilusión velo despois do seu paso por Got Talent e ver como vai medrando enriba do escenario e como artista..”, di Lolo respecto do pequeno ilusionista monfortino.
O responsable na coordinación e produción refire así mesmo que “tamén están algúns dos mellores magos do país, e incluso case do mundo, como Jorge Blas, que volve por segundo ano consecutivo; Mario López, que tamén foi campión mundial; Jessica Guloomal, Dania Díaz… en fin, xente que triunfou en todo o mundo pero que volven a Sarria porque están moi arroupados e séntense moi a gusto… eu estou súper feliz de que veñan apoiar o festival e que estean aquí é un luxo para todo o mundo”.
ASISTENCIA AOS ESPECTÁCULOS
Para acudir aos espectáculos programados cómpre levar máscara e o aforo irase cubrindo por orde de chegada agás nos seguintes espazos: O Meigallo, As de Pikas e O Chanto que terá que realizarse reserva previa.
“Espero que saia todo ben e tamén que sexa o último ano que esteamos con isto do Covid”, remata Roberto Lolo.
Para coñecer horarios, escenarios e espectáculos acceder á páxina web do Concello de Sarria.
