O delegado territorial da Xunta en Lugo, Javier Arias, visitou o pasado 27 de agosto o Concello de Chantada, acompañado polo alcalde, Manuel Varela, con quen comprobou o resultado dalgúns dos traballos executados grazas a este obradoiro de emprego, na procura da mellora e recuperación de espazos públicos do citado municipio.
TRABALLOS REALIZADOS
Durante nove meses os participantes nesta iniciativa realizaron labores de albanelaría e xardinaría, entre as que destacan, por exemplo, o acondicionamento de beirarrúas na avenida de Monforte; na praza de Galicia, no treito máis próximo aos xulgados; e na mellora de pavimentos na contorna das pistas de tenis.
No que respecta á área de xardinaría, os traballos centráronse en instalación e mantemento de xardíns e zonas verdes nas contornas do campo de fútbol de Sangoñedo e do paseo fluvial do río Asma, ademais doutras importantes intervencións no parque Eloisa Rivadulla; na avenida de Monforte; na praza de Galicia; no pavillón deportivo do concello, e no viveiro municipal, entre outras.
REPERCUSIÓN DESTE TIPO DE ACCIÓNS
Javier Arias lembrou que estes obradoiros de formación especializada impulsan o emprendemento, incluíndo ademais incentivos para a contratación de participantes en empresas da contorna durante un mínimo de tres meses, que no caso deste obradoiro pode supoñer a contratación de 14 persoas, cun investimento de 21.000 euros.
Por último, o delegado territorial subliñou que todos os alumnos e alumnas traballadores reciben un certificado de profesionalidade que lles permite acreditar a formación recibida, o que facilita a súa inserción laboral.
