A Deputación de Lugo adxudicou a licitación das obras de rehabilitación dun novo tramo da estrada LU-P-3202, que une Monforte de Lemos co núcleo poboacional de Currelos, no concello de Saviñao. As obras de mellora contan cun investimento de 133.100 euros.

Unha vez finalizadas as obras, que terán lugar entre os puntos quilométricos 6,9 e 10,4, a vía verase mellorada en oito quilómetros, desde o punto 2,6 ao 10,4, segundo sinalou a Deputación nun comunicado.

O presidente da Deputación de Lugo, José Tomé Roca, apuntou a este respecto que a mellora da rede de estradas provinciais é “unha das liñas de actuación prioritarias” do Goberno provincial, ao que se dedicaron 16 millóns de euros dos Orzamentos.

“A mobilidade é un dereito máis da cidadanía, e manter en bo estado as comunicacións por estrada é imprescindible para garantir a igualdade de oportunidades e o equilibro territorial, e, por tanto, para fixar poboación no rural”, destacou o presidente provincial.