O BNG de Pantón dicía a pasada semana facerse eco das críticas dalgúns empregados municipais que aseguraban ter cobrado as nóminas de agosto cunha semana de retraso porque o concello tiña privatizado este servizo.

Desde o concello de Pantón, o alcalde, José Luis Álvarez, asegura que as nóminas se pagaron como sempre a pesar de vir de xubilarse o funcionario encargado de facelas. “O concello paga o último día de mes e sae en nómina o día 1 como lles saiu a todos, excepto aos que cobran por ABanca que lles saiu o 2 porque ABanca tivo un problema informático o día primeiro. Entón, non se pode falar de retrasos dunha semana”, asegura o alcalde.

Sobre a privatización deste servizo, José Luis Álvarez, aclara “Non se privatizou nada, as nóminas facíaas un funcionario que tamén se encargaba de dar de alta e de baixa ao persoal, xubilouse e mentres non metamos outro funcionario, contratamos os servizos, como fan todos os concellos da contorna. Eramos o único concello que faciamos a nóminas nós, quedamos nesta situación e veremos cal é a mellor opción para o concello.”