Beatriz Sestayo analizou con Isabel Rodríguez os últimos resultados económicos obtidos nos polígonos industriais que xestiona SEA na provincia e que suman un total de 870.626 metros cadrados brutos.

Do Polígono Industrial do Reboredo en Monforte destacou que “durante estes exercicios manifestou un impulso que é exemplo de dinamización e da cooperación institucional a favor do entendemento e do interese xeral”. Pecháronse operacións de venda de ata 16 parcelas en só tres anos. Neste 2021 chegáronse a pechar operacións con sete empresas, que afectan a máis de 51.000 metros cadrados de superficie, por unha cifra superior ao millón de euros (290.784 o primeiro trimestre e 795.129 o segundo.

Ante esta situación e dado que se logrou que só queden dispoñibles catro parcelas na actualidade, Beatriz Sestayo explicou que SEA comezou a analizar a ampliación do polígono, atendendo á demanda existente.

A xestión directa, a comunicación e a colaboración institucional, xunto coas distintas medidas impulsadas para facilitar a instalación de emprendedores, propiciaron que nos últimos anos os polígonos de SEA na provincia multiplicasen a súa ocupación.