Camiño da innovación axuda a identificar os proxectos de pequenas e medianas empresas que poden ter un percorrido a través da innovación para gañar competitividade. A iniciativa conta tamén coa experiencia de máis de 50 casos de éxito de pemes que están a competir en mercados internacionais. Na cita de Monforte contouse coa presenza de Codeor –empresa de Pereiro de Aguiar especializada na fabricación de calzado profesional e de farmacia–, A Man de Prado –unha adega de Sober pertencente á D.O Ribeira Sacra– e Mieles Anta, de Bóveda.
“A competitividade das pemes está directamente relacionada cos investimentos en innovación e, nese sentido, temos a responsabilidade de achegar as iniciativas en materia de deseño, de posicionamento da marca e de mellora de produto e procesos aos autónomos e pequenas e medianas empresas para que poidan diferenciarse e sigan tendo esa proxección dentro dos mercados”, explicou Francisco Conde.
Neste sentido, asegurou que a Ribeira Sacra, desde o punto de vista dos seus sectores produtivos, “ten unha enorme oportunidade para seguir proxectando novos proxectos vinculados coa innovación e a xeración de emprego”. Camiño da Innovación fai ruta por 18 concellos galegos, o programa chega este mércores, 1 de decembro, a Chantada.
Impulsar o emprendemento
Co ánimo de contribuír a este fomento da cultura innovadora no tecido empresarial, sobre todo do rural, e trasladar as oportunidades que presenta a innovación para transformar e a emprender un proxecto de negocio, a Xunta de Galicia implantará unha rede de coworkings no primeiro trimestre de 2022.
Dos tres espazos que acollerá a provincia de Lugo, un desenvolverase na Ribeira Sacra, tendo a súa sede en Monforte, onde o programa xa colaborou no desenvolvemento de 85 proxectos nesta comarca –no conxunto da provincia foron 192 as iniciativas apoiadas–.
Así mesmo, o Goberno galego tamén impulsa o programa de axudas Galicia Emprende, que o ano pasado axudou á posta en marcha de catro proxectos empresariais na provincia de Lugo, os cales mobilizaron 1,9 millóns de euros e permitiron a creación de 27 postos de traballo.
