O delegado territorial da Xunta en Lugo, Javier Arias, acompañado polo xerente da área sanitaria, Ramón Ares, asistiu este xoves 16 de decembro ao cribado organizado pola Consellería de Sanidade en Chantada co fin de detectar posibles casos asintomáticos da covid-19 e previr contaxios.
Arias apuntou que neste momento a Zona Sur ten a incidencia máis alta da provincia, con máis de 500 casos por 100.000 habitantes; mentres que na zona centro é de 220 e na comarca da Mariña ronda os 100.
Tamén salientou a boa resposta da cidadanía, que acudiu ao recinto gandeiro de Chantada desde primeira hora da mañá para realizar a PCR. O Sergas convocou a toda a veciñanza a acudir voluntariamente tomándose mostras durante todo o día. Tamén se desprazaron ata o lugar onde se realizaron as probas os alcaldes de Chantada, O Saviñao, Carballedo e Taboada.
