O novo equipamento foi adquirido polo Concello de Paradela con cargo á orde de axudas da Consellería de Medio Ambiente, Territorio e Vivenda para municipios de menos de 3.000 habitantes.
Co novo servizo mellórase e amplíase a xestión de residuos especiais de competencia municipal, co fin de favorecer a súa axeitada recollida, clasificación e preparación para a reutilización. De xeito paralelo, tamén se evita a proliferación de puntos de vertido incontrolado nas contornas e espazos naturais.
Esta convocatoria de axudas da Xunta cobre o 100% do custo da compra do vehículo, cun máximo de 70.000 euros para unha solicitude individual e de ata 100.000 euros para unha agrupación de varios concellos.
Os beneficiarios teñen a posibilidade de escoller entre catro modelos de vehículos subvencionables: un contedor/caixa metálica de gran volume —se a entidade local dispón de camión adaptado con equipo de gancho para a súa carga e traslado—; un remolque e contedor metálico de gran volume —cando o concello dispón dun camión adaptado para a súa carga e traslado—; un camión con caixa e chasis; ou unha furgoneta adaptada con diferentes contedores ou compartimentos.
Os equipos móbiles veñen a completar a rede autonómica de puntos limpos para que toda a cidadanía poida ter acceso ao servizo. Na zona sur este ano beneficiáronse destas axudas os concellos de Folgoso do Courel, O Páramo e Bóveda.
