Os senadores populares preguntarán ao Goberno central como explica “esa diferenza de máis de 200 millóns de euros con respecto ao orzamento anunciado e a licitación real e se están realizando recortes á costa da seguridade e da modernización e mellora do corredor.”
Os populares explican que “en só 10 meses as adxudicacións nas obras da plataforma da liña -que inclúen o tratamento da infraestrutura e o túnel substitutivo do Oural- contan con baixas do 19% dado que se licitaron 152 millóns de euros, pero só se adxudicaron 77”.
Os traballos relacionados coa vía sumarán 103M€ e adxudicáronse en 69 millóns de euros con baixas do 9% de media. A electrificación entre Monforte e Lugo coa subestación de Oural e a renovación da liña eléctrica entre Ourense e Monforte consumirán 53 millóns de euros dos que hai adxudicados 27, cunha baixada media dun 18%. Os sistemas de control, mando e sinalización coas telecomunicacións necesitarán 48 millóns de euros que xa se adxudicaron completamente por 38, con baixas medias do 22%. E, finalmente, as obras, instalacións de protección física e seguridade da vía requiren 25 millóns de euros, dos que se adxudicaron 11, cunha baixa media do 38% sobre a cantidade inicialmente anunciada. Deste último apartado só falta licitar a eliminación dos anunciados 36 pasos a nivel.
Os senadores recordan que, con todo, “estas obras non conseguen transformar a liña en alta velocidade (máis de 250 km/h) nin en velocidade alta (apta para máis de 200 km/h); senón que se dirixen a adecuar a vía Lugo-Monforte-Ourense para que sexa segura e estea operativa o maior tempo posible”.
“O motivo polo que Lugo queda á marxe da alta velocidade ferroviaria é que o Ministerio de Transportes rexeitou modificar o trazado actual e eliminou as dúas variantes -que permitirían reducir a distancia uns 15 quilómetros e elevar as velocidades medias dos 75 km/h actuais aos 115 km/h- que permitirían reducir os tempos entre Lugo e Ourense á metade”, remarcan.
