O obxectivo deste proxecto é poñer en valor dous soutos en Folgoso e Moreda, mediante a súa limpeza e recuperación para a produción sostible. A actuación, que comezou coa identificación de árbores e propietarios, está xa na súa segunda fase que pasa pola mellora dos viarios de acceso e o rozado das terras. Está previsto que no 2019 entre na súa última etapa coa poda das árbores e a mellora sanitaria das mesmas.

Desde a Consellería destacan que este tipo de actuacións pretenden loitar conta o abandono das terras, por iso ademais das reestruturacións parcelarias, desenvólvense outras iniciativas como esta destinadas a poñer os terreos a producir. Neste senso estanse recuperando praderías para pasto nos Ancares e en Sober. En Arnoia recuperouse unha finca para a produción de pemento baixo esta denominación de orixe e en Cualedro e Oímbra a produción centrarase na plantación de cereais, leguminosas e viñedos. Estes proxectos desenvólvense en terras afectadas por incendios.