O inverno e a primavera foron excepcionalmente pobres no tocante a precipitacións e, se o verán continúa por este camiño, pódense dar dificultades nas traídas veciñais. Por Chantada prioriza, ademais a salvagarda da cada vez máis escasa auga potable, “xa que os nitratos e outras polucións comprometen seriamente que no país dos mil ríos haxa auga que poidamos beber sen risco para a saúde humana e animal.”

Pídenlle ao Goberno local que comece a facer política preventiva, aconsellando un uso racional da auga e “predicando co exemplo, cómpre vixiar que non se volvan producir vendas de auga por parte da concesionaria sen coñecemento, aparentemente, por parte do Goberno local. Neste sentido, debemos volver lamentar o uso de glifosato na vila de Chantada aínda esta mesma semana, a crónica insuficiencia da depuradora que non se atende desde as diferentes administracións ou a ausencia de separativo de pluviais e fecais en amplas zonas da vila. Cando nos deamos de conta do mal que estamos tratando o medio e as reservas hídricas pode ser xa tarde demais.”

Por Chantada fai un chamado á Confederación Hidrográfica a vixiar o impacto ambiental e social dos pantaláns e embarcacións que están autorizando e consideran que se debería elaborar un estudo muldisciplinar.

“As institucións serias deberían actuar xa, pois a seca é evidente e fai prever unha época estival moi complicada en canto a fornecemento de augas, mais tamén para os incendios”, demandan á Xunta un reforzo dos servizos de extinción e aumentar as dotacións para rozado mecánico e manual de xeito preventivo, así como revisar as infraestruturas de fornecemento de auga en caso de lume.

“Se non actuamos agora o cenario máis plausíbel será un verao con restricións no consumo con consecuencias para a hostalería, as piscinas municipais ou mesmo as exploracións agrogandeiras”, conclúen.