O BNG de Pantón vén de presentar unha moción para o seu debate en pleno na que insta a abrir de novo a Área Recreativa da Maiorga, que leva “pechada desde 2021”. Unha situación que, segundo denuncia a formación nacionalista, provoca a “depauperización das instalacións e a perda de fluxos de visitantes que xa tiña fidelizados a antiga concesión”.
“En Pantón debemos ser quen de ofrecer iniciativas turísticas asociadas ao territorio, manter e divulgar os camiños das ribeiras con horizontalidade e marcar a diferenza por integrar a poboación ribeirá na oferta turística, xa que aínda temos xente que habita a ribeira”, explica a concelleira e portavoz do grupo municipal, Ana Rosa Prieto.
Neste sentido, a casa do barqueiro, hoxe coñecida como Área Recreativa A Maiorga, na parroquia de Vilar de Ortelle, supón “unha oportunidade que non podemos desprezar, nin temos tempo que perder”, sentenza Prieto, que considera que é “de suma importancia” que se reabra á “maior brevidade posible”, dado que “serve de apoio ás diferentes iniciativas empresariais que se serven do Pantalán, e embarcacións públicas e privadas que navegan o río Miño”.
Por todo isto, o BNG propón que o Concello de Pantón proceda a adxudicar as instalacións da Maiorga antes do mes de xullo do 2022 e que actúe “con dilixencia e axustado á legalidade” para evitar conflitos que, din, “se repiten unha e outra vez”.
