Na súa intervención, Aira explicou que Chantada conta con dous institutos, o Val do Asma e o Lamas das Quendas, centros complementarios na súa oferta formativa para a poboación de Chantada e contorna.
No mes de febreiro facíase pública a intención da consellería de Educación de destinar a Formación Profesional do Val do Asma e o alumnado ao outro instituto. Para a deputada, esta decisión non resulta “entendible”, nin para a comunidade educativa nin para a poboación de Chantada xa que o Instituto Val do Asma “é un centro que funciona extremadamente ben e as numerosas solicitudes de matriculación contribúen a que o alumnado poida escoller entre diferentes ofertas educativas.”
“O máis incomprensible”, recalcou a nacionalista, é que a medida non fora tratada cos actores implicados e que a Consellería non tivera en conta o rexeitamento de todos os ámbitos afectados. Durante este tempo houbo movementos sociais para reivindicar que se manteñan ambos institutos.
A xuízo da deputada, a oferta formativa de FP merece unha especial atención e debe resultar “atractiva” para a mocidade do interior con estudos enfocados a saídas profesionais que favorezan a “implantación de xuventude no rural. Non podemos permitir que se perda a oferta formativa de Chantada e comarca baixo a obriga de materias con cinco alumnos ou alumnas”. Este criterio, dixo a deputada, “non discrimina positivamente o rural e avogou por manter a oferta, á marxe do número de rapaces e rapazas matriculadas”.
A deputada esixiu “valentía” ao Director Xeral de Educación, José Luís Mira e un compromiso real para aplicar políticas que melloren a oferta formativa dos centros de xeito coordinado dentro do territorio, “hai que abrir o abano o máximo posible, facilitar o transporte público para o alumnado, aproveitar o potencial dos centros polas tardes, retirar a norma que cuantifica o valor das persoas que queren estudar, de modo que 5 valen e 4 non valen aínda que haxa medios para iso, o cal a máis de ser absurdo debería ser ilegal”.
“A poboación, os cadros directivos, nais e pais e crianzas, debe ter a seguridade da oferta educativa e non a incerteza sobre o que pode acontecer no vindeiro curso,” concluíu.
