As paradas que non constaban nin como paradas oficiais nin tan sequera como “paradas baixo demanda” eran as seguintes: Montefurado, Bendilló, Paradaseca-Sequeiros, Os Novais, O Nocedo e Freixeiro. Nesta situación, o BNG de Quiroga dirixiuse ao Servizo de Mobilidade de Ourense –Consellería de Infraestruturas e Mobilidade– solicitando se tivera por presentado o escrito dando traslado da situación que xerou queixas dalgúns veciños e veciñas, e tamén pedindo que se incluíran as paradas xa comentadas no servizo de autobús que fai o traxecto O Barco-Ourense.
Semanas despois, o Concello de Quiroga anunciaba que realizara tamén unha xestión coa Dirección Xeral de Mobilidade da Xunta de Galicia solicitando tamén a recuperación das paradas e segundo sinalaba tamén no seu comunicado, o servizo nas paradas indicadas sería recuperado.
Nestas alturas do mes de maio o BNG comprobou que as paradas foron xa incorporadas ao itinerario tendo a día de hoxe activas todas as posibles dentro do termo municipal de Quiroga. Esas paradas son: San Martiño de Alvaredos, Montefurado, Vilaster, Bendollo, Sequeiros, Os Novais, Quiroga, O Nocedo, Augas Mestas, Freixeiro e Conceado.
Deste xeito, e tras ambas xestións, a do BNG de Quiroga e a do Goberno Municipal de Quiroga, recupéranse como paradas oficiais, e sen necesidade de ‘pedilas a demanda con antelación’, Montefurado, Vilaster-Bendilló, Sequeiros-Paradaseca, Os Novais, O Nocedo e Freixeiro.
A información xa aparece na web da empresa concesionaria do servizo de autobús O Barco-Ourense e “agora procederemos a informar á veciñanza e a poñer nas paradas os paneis que detallan paradas e horarios”, sinalan desde o BNG.
