As obras do Centro de Maiores da Pobra do Brollón comezarán durante as próximas semanas, segundo anunciou o propio presidente da Deputación de Lugo, José Tomé. O centro recibe financiamento tanto do Goberno provincial como do local.
“Cumprimos o compromiso cos municipios e os veciños, cun servizo público que marcará un antes e un despois na vida dos veciños”, destacou Tomé.
A Deputación achega 1,6 millóns de euros á construción do centro, mentres que o Concello pon 200.000 euros e a parcela, na Avenida de Outeiro, onde se situará a residencia
Esta dotación social contará con ata 38 prazas de residencia, onde terán preferencia os veciños da Pobra. O edificio será de planta baixa en forma de L cun pequeno semisótano e e unha superficie construída de 1.779 metros cadrados. Estiman ademais a creación de 25 empregos directos.
Doutra banda, a Deputación de Lugo levará a seis concellos da provincia a mostra Cegasal, unha asociación para a inserción laboral das persoas con discapacidade.
Así o anunciou este mércores a Deputada de Réxime Interior, Promoción do Territorio e Turismo, Pilar García Porto, na presentación da iniciativa no Pazo de San Marcos, onde tamén estivo o presidente da Asociación Empresarial Galega de Centros Especiais sen Ánimo de Lucro (Cegasal), José Antonio Vázquez Freire.
A exposición estará composta por 24 imaxes do fotógrafo coruñés Diego Silva, e que percorrerá os concellos de Monforte de Lemos, Sarria, Viveiro, Foz, Vilalba e Lugo entre mediados do mes de xuño e setembro.
Coincidindo coa última parada da exposición, no Pazo de San Marcos, haberá tamén unha xornada de formación sobre os Centros Especiais de Emprego, aberta á cidadanía.
