O vindeiro sábado 11 de xuño, ás 19:00 h., terá lugar no Auditorio Municipal de Chantada unha conferencia-coloquio baixo o título “O leite materno: o mellor exemplo de alimento funcional”. Incidirase, entre outras cousas, na súa aplicación ao cancro e a outros aspectos da nosa vida.
A encargada de abordar o tema será a chantadina Cristina Fente Sampayo, docente na área de Nutrición e Bromatoloxía da Facultade de Veterinaria da Universidade de Santiago de Compostela, investigadora de proxectos nacionais e internacionais, recén académica na Real Academia de Farmacia de Galicia (marzo 2022) e propietaria da Farmacia La Salud de Lugo.
Cristina Fente falará do leite coma o mellor alimento funcional que existe asegurando o alimento para o bebé e protexéndoo de enfermidades. Segundo se coñece, moitos dos seus compoñentes presentan un gran potencial terapéutico. Ademais, a ausencia de efectos secundarios e o perfil seguro dos compostos fai que o risco na súa avaliación clínica sexa moi pequeno. Debido a isto, hoxe en día hai moitos ensaios clínicos activos neste campo, tamén fronte ao cancro.
CHANTADA CONTRA O CANCRO
“Chantada Contra o Cancro” é unha asociación de Chantada que apoia a familiares e pacientes que sofren esta enfermidade, promove hábitos de alimentación e vida saudable e realiza actividades divulgativas.
Trátase da primeira asociación contra o cancro do sur de Lugo e o seu obxectivo principal foi, desde a súa creación en decembro de 2016, poñerlle cara a un problema que afecta por desgraza a moitas persoas e ás súas familias e entorno próximo. No seu día a presidenta da asociación, María Jesús Rodríguez, entendía que “era preciso xuntarse para dar apoio aos/ás enfermos/as e familias, compartir experiencias, ofrecer información e conferencias de vida saudable e relativas a esta enfermidade”.
