O corredor fluvial do Miño iniciouse unindo na ribeira esquerda do Miño a praia da Cova coa aldea de Belesar. Posteriormente ampliouse dende as proximidades da presa de Belesar ata Pudio, lugar da parroquia da Candaira e coa intención de prolongalo ata case Ponte Mourulle entre O Saviñao e Taboada. 

A estrada é de titularidade provincial e a día de hoxe presenta dificultades de acceso ás propiedades e viñedos dos veciños do Saviñao. “Urxe unha urxente actuación de limpeza que tramitiron estes veciños á asociación veciñal. Esperemos que a presenza de maquinaria da Deputación na comarca sexa aproveitada para esta necesaria limpeza”, insisten desde a Asociación Veciñal.

A asociación veciñal refírese ao estado da estrada do Corredor Fluvial do Miño que parte da presa de Belesar paralelo ó río na direción norte. “A vexetación invade a estrada de maneira que ocupa o 50 % da calzada, despois de dous anos sin realizarse desbroce de mantemento. Este corredor é utilizado, ademais da finalidade paisaxística e turística, polos veciños que posúen terras e viñedos na ribeira esquerda, por riba da presa de Belesar e o tránsito de dous vehículos á par é imposible a día de hoxe, polo que a limitación á circulación é importante, debendo retroceder marcha atrás no caso de coincidir dous coches en sentido contrario”, explican desde a Asociación e solicítanlle á Deputación, “a inmediata limpeza e desbroce das cunetas do corredor fluvial do Miño dende o seu punto de partida próximo á presa de Belesar e a Pena de Abeado.”