O Círculo Cultural e Recreativo do Saviñao acolle ata o 4 de setembro unha exposición de acrílicos de Gelín. Ademais o sábado, día 13 de agosto, o Círculo ofrece un concerto de Sergio Alba ás 8 da tarde. O artista presentarán versións dos anos 90.
Alberte Montes, actor e humorista orixinario dos Anguieiros en Quiroga, ofrecerá o venres, 12 de agosto, un monólogo en Terras do Incio. A actuación será ás 20.30 na terraza do Hotel Rural Hermida, dentro do ciclo ‘Solpor Hermida’ que fai posible acompañar o goce dos seus fermosos solpores con actuacións en vivo.
Os monólogos de Alberte Montes caracterízanse pola súa singular visión da realidade, as súas coñecidas “Albertadas”, e tamén por amosar o xeito de ser dos galegos coas súas virtudes e os seus defectos. Neste senso, o recurso dos tópicos ten un obxectivo, non desmontalos nin erradicalos, se non transformalos e cargalos de valor. “Historicamente teñen empregado os tópicos para ridiculizarnos e mofarse de nós, feito que explicaría en parte que arrastremos algo de autoxenreira. Eses tempos foron pasando e agora xa somos quen de defendernos con orgullo dese estigma combatendo aos ignorantes, ríndonos dos propios defectos e chufando das nosas diferenzas”, afirma Alberte nun dos seus textos máis coñecido, “Galego pode selo calquera”.
