‘Inmarcesibles’, exposición que convida a reflexionar sobre a exclusión invisible que experimenta o sexo feminino cando falamos do seu físico, xa se pode ver en Sarria ata o 20 de novembro –en horario de 9:15 a 14:00 h.– na Antiga Prisión Preventiva, lugar que acolle agora a oficina municipal de turismo.

Respecto a esa ‘exclusión invisible’ a mostra quere facernos reflexionar porque nela ensinan que o corpo da muller debe ser o máis parecido posible ao canon de beleza establecido, loitando para conseguir encaixar neses parámetros e rexeitando se non o logran; e invisible porque dita ensinanza non se transmite de forma directa, pois é silenciosa e sutil, maquillándose baixo a premisa de que a muller debe ser libre e ten que estar preocupada por unha axeitada saúde física e mental. Para conseguir este obxectivo, contouse coa participación libre de diversas mulleres que quixeron mostrarse tal e como son, defendendo todo tipo de corpos femininos e reivindicando a súa aceptación.

‘Inmarcesibles’ é unha exposición itinerante, impulsada desde Servizos Sociais do Concello de Sober con financiamento do Ministerio de Igualdade. Foi un proxecto do Concello de Sober elaborado por medio do Pacto de Estado contra a Violencia de Xénero, polo que se pretende realzar a auténtica beleza, mostrando o sexo feminino tal e como é, e non como pretenden que sexa. As fotografías son de María Fernández.