A narradora, Antía Vázquez, acompañada polo músico, André Espiñeira, é a encargada de presentar ás crianzas este personaxe, un carboeiro de barba vermella que baixaba das montañas ás vilas a noite do 24 ou o 31 de decembro para tocar o ventre das crianzas e comprobar se comeran suficiente durante o ano, deixando ao seu carón agasallos e castañas e desexos de felicidade e comida.
A súa historia trasmitiuse a través da tradición, especialmente na zona do Courel e do oriente ourensán. Na última década, asociacións e colectivos culturais de distintos puntos de tomaron a iniciativa para recuperar este personaxe e as lendas e ritos que o rodean.
A vicepresidenta da Deputación de Lugo, Maite Ferreiro, sinalou que “un ano máis poñemos en marcha este calendario de visitas co obxectivo de achegar a nenos e nenas esta figura do Nadal galego e a súa historia” e valorou “a oportunidade que esta personaxe ofrece para reivindicar as nosas tradicións e tamén valores ligados ao coidado do territorio”.
Nestes espectáculos, a filla do coñecido Apalpador toma o relevo do seu pai e baixa das montañas para encontrarse coas crianzas da provincia nun formato de contacontos musicado e interactivo onde se mesturan cantigas, lendas e dinámicas. Estará acompañada polo seu irmán músico André, para mergullarse con cancións da súa misteriosa historia. Ademais, levará froitos que recolle durante todo o ano e agasallos fabricados por ela mesma para entregar aos nenos e nenas neste Nadal.
Calendario sur de Lugo
- Venres, 16 de decembro. CHANTADA. CEIP San Xoan de Requeixo
- Sábado, 17 de decembro. TRIACASTELA. Fonte do Lunar
- Luns, 19 de decembro. O INCIO. CEIP Ricardo Gasset
- Mércores, 21 de decembro. PANTÓN. CEIP Monte Baliño
- Xoves, 22 de decembro. SARRIA. Escola Educación Infantil Xela Arias
- Xoves, 22 de decembro. O PÁRAMO CEIP do Páramo.
- Xoves, 22 de decembro. SAMOS. CEIP de Samos
- Venres, 23 de decembro. CARBALLEDO. Punto de Atención á Infancia
- Xoves, 29 de decembro. O SAVIÑAO. Auditorio Municipal de Escairón
- Luns, 2 de xaneiro. CARBALLEDO. Campo da Feira de Castro
