A Vicepresidencia da Deputación de Lugo apoia a organización do mercado Quilate Especial Nadal, que se celebrará o vindeiro domingo en Sarria. O deputado de Artesanía e Deseño, Efrén Castro, presentou o evento xunto ao grupo de anticuarios de Sarria. Nesta edición especial do mercado xuntarase unha vintena de postos nos que se poderán atopar obxectos antigos e vintage, vinilos e obxectos curiosos e de coleccionismo. Tamén haberá postos de repostería e confitería artesá.

A área de Artesanía e Deseño levará ao mercado demostracións de artesanía, aproveitando a cita, para promocionar a artesanía lucense e os oficios tradicionais. Así, as persoas visitantes poderán ver ao vivo traballos de cestería, olería e tecedura.

Efrén Castro sinalou que “as demostracións de artesanía darán ao mercado unha dimensión tradicional, moi acaída para as datas de Nadal” e amosou o seu respaldo á iniciativa dos anticuarios sarriaos que buscan consolidar unha edición especial do mercado nas datas de Nadal, tamén de cara aos vindeiros anos.