Na súa páxina web pódense ver detalladas as súas recomendacións para achegarse nestas datas a aldeas do Concello de Pantón que foron decoradas pola veciñanza.
Aldea de conto de Castillón
Comentan que este é o segundo ano que teñen a iniciativa de decorar coa colaboración dunha asociación de veciños. A aldea engalanada foi San Antonio de Castillón. Na web saen fotos e a ubicación para chegar.
Aldeas de Galegos e San Vicente
Galegos tamén está decorada con materiais reciclados e sostibles estando os adornos por diferentes lugares da aldea. En San Vicente de Castillón foi a familia da ‘Casa do Turulas’ quen quixo colaborar para engalanar a aldea neste Nadal. A artífice, Alba, “inspirada polas decoracións de Galegos, Castillón e mesmo a vila de Allariz, decidiu tomar pinceis e madeira e decorala”, din dende Segredos de Pantón.
O Belén de Torrón
Outra recomendación, un clásico do Nadal, é ver o Belén de Torrón, que se fai dende hai moitos anos grazas ao traballo de Rosario Lobelle. Torrón está nos Peares, na parroquia de San Vicenzo de Pombeiro.
Casas decoradas en Tuiriz
Na parroquia de Santa María de Tuiriz, e por terceiro ano consecutivo, a Asociación Sociocultural de Veciños de “Tuiriz con U” organizaron un concurso de decoracións de Nadal. Na web de Segredos de Pantón amosan algunhas fotos cos traballos realizados.
