O sábado 31 de decembro de 2022, día no que tivo lugar a proba previa á primeira etapa do Dakar 2023, será unha data que non esquecerá Eduardo Iglesias.

O piloto monfortino, que chegaba a Arabia Saudita con moitas ganas e boas expectativas pola súa progresión nesta competición, sufríu un accidente que o deixaba fóra da competición máis dura do mundo na súa categoría de rallys.

A noticia chegaba polas redes sociais e despois tamén por algún medio de prensa provocando loxicamente o interese preferente pola súa saúde. En pricipio e, para non alarmar, comentaba o seu equipo que non era grave e que “estaba sendo atendido polos servizos médicos da organización”.

MENSAXE DE EDUARDO IGLESIAS

Este pasado domingo, 1 de xaneiro de 2023, o propio Edu Iglesias mandou unha mensaxe polas redes sociais. Confirmaba que estaba fóra de carreira, que rompera as dúas clavículas e dicía que o sentía moito. “Estou moi desgustado e isto está sendo moi difícil de dixerir”, comentaba tamén ao tempo que e desculpaba por non poder contestar a todas as mensaxes. Como remate do seu breve comunicado daba as grazas polos ánimos recibidos.