O hospital comarcal de Monforte conta cun novo equipo de tomografía axial computerizada (TAC), adquirido pola Xunta por algo máis de 408.000 euros e que xa está en marcha. Con esta adquisición renóvase a tecnoloxía que prestaba servizo desde fai máis de dez anos neste centro.
O conselleiro de Sanidade, Julio García Comesaña, xunto coa directora do hospital, Inmaculada Ramos, e membros do equipo directivo da área sanitaria de Lugo, A Mariña e Monforte de Lemos, visitou esta semana o equipo e ao persoal do servizo de radiodiagnóstico do hospital que xa comezou a traballar con este instrumento nestes días.
Este investimento englóbase dentro dos contratos de adquisición de nova tecnoloxía sanitaria adxudicados ao longo de 2022 polo Goberno galego por valor de máis de 67 millóns de euros, destinados a canalizar os fondos europeos Next Generation, de face á renovación do equipamento hospitalario.
O goberno galego tivo presentes as necesidades dos hospitais comarcais á hora de decidir o emprego destes fondos europeos e incluíu ao sete hospitais comarcais no contrato de renovación dos equipos de tomografía axial computerizada. Así, ao longo desde ano 2023, a Xunta completará a instalación de novos equipos TAC en todos os hospitais comarcais galegos.
