Un ano despois da vaga de lumes que tanto dano fixo a Galicia e que tamén afectou ás terras de Lemos, sendo Chavaga un dos lugares afectados, quedan temas pendentes por resolver. Un deles, no caso deste lugar, é o da reparación dos danos ocasionados ao castro e aos camiños tras a retirada de madeira queimada polos madeiristas. Os populares instan ao Goberno Local a esixir un resarcimento por parte dos responsables e abren de novo o debate sobre a necesidade dunha ordenanza que regule a extracción de madeira dos montes do municipio a través de espazos públicos. Segundo se coñece, existe un borrador elaborado polo anterior goberno que non chegou a aprobarse e os populares pedirán retomar a aprobación dunha normativa nese sentido.
Segundo palabras da voceira municipal desta formación política, Julia Rodríguez: “despois de dous meses nin o señor Tomé nin o concelleiro de obras teñan tomado ningunha iniciativa ao respecto dos danos provocados pola maquinaria pesada tanto nos muros de pedra do propio castro coma nos camiños municipais e na ladeira do monte tal e como temos comprobado dende o Grupo Popular Municipal”.
a riqueza dos castros en monforte
O termo municipal de Monforte conta con numerosos castros como son, por exemplo: en Baamorto e Cinsa, Caneda, Fabeiro, Chavaga, Fiolleda, Marcelle, o de San Vicente (Monforte capital), os de Moreda, o das Nocedas, o da Parte, o da Penela, o do Cornao, os de Reigada, Rozavales, o Eivedo, Tor, Sindrán, a Vide, Vilamarín…
Moitos están sen catalogar e outros, seguramente sen descubrir e este feito favorece que sexan máis vulnerables á hora de sufrir danos, ás veces, irreparables. Precisamente, o castro de Chavaga “é un destes que non están á vista, pero que a memoria popular e mesmo a súa orografía rebelan a súa importancia e o seu tamaño”, explican dende o PP local.
