Por unha banda instalouse a plataforma, ubicada no Alto da Picota que se fixa sobre a rocha, elevándose sobre ela e intentando que o impacto sexa o menor posible sobre o terreo e sobre a visión do conxunto. Acondicionouse tamén un acceso para vehículos, zona de estacionamento adaptado e miradoiro adaptado a persoas con mobilidade reducida.

Instaláronse paneis interpretativos e a sinalización do itinerario dende a Ponte Nova dos Peares. O investimento para este punto de contemplación dos tramos finais dos Itinerarios de Interese Paisaxístico 16 e 17 foi de 65.814,81€.

Deste este miradoiro pódese observar:

• Últimos km do itinerario do Miño
• A presa dos Peares ao completo e o embarcadoiro
• O núcleo dos Peares e as súas pontes
• A icónica confluencia dos ríos Sil, do Miño e Bubal
• A estación do tren, a vía ferroviaria e a característica ponte de ferro azul, elemento destacado do patrimonio industrial de Ribeira Sacra
• O trazado da N-120 (principal vía de comunicación na Ribeira Sacra) tanto no seu trazado antigo coma no novo
• Mosteiro de Santo Estevo e Os Castros, que pertence ao outro itinerario (PIF 17B)
• Bancais de viñedos
• As vistas dos catro concellos que conforman Os Peares (A Peroxa, Nogueira de Ramuín, Carballedo e Pantón) pertencentes ás provincias de Lugo e Ourense
  
  
  

Miradoiro A Picota – Os Peares / Consorcio de Turismo da Ribeira Sacra