O portavoz do PP na Deputación, Javier Castiñeira, asegura que o goberno bipartito usa fondos públicos para facer política partidista e non para facer provincia, “non nos sorprende nada, pero si que nos sorprende que o fagan tan a cara descuberta como o están a facer nesta precampaña. O caso máis recente é a promoción do seu candidato en Taboada, outorgándolle ao aspirante socialista, ademais de fondos, medios para promocionarse, como vídeos da fundación TIC e un libro das súas experiencias”.

Para os populares, “está claro que hai un uso interesado, inmoral, dos medios propios como é a Fundación TIC ou a área de publicacións para libros e demais, e tamén de fondos para comprar propaganda e publicidade que tiña que estar para outros fins”.

Castiñeira conclúe: “Pedimos á Deputación de Lugo que cese na súa actitude. O PP resérvase calquera outra actuación, porque entendemos que o que está a pasar na Deputación co uso de fondos para promocionarse politicamente é algo que non pode admitirse; esa non é a forma transparente de facer política”.