No obradoiro de comadres que terá lugar este martes a partir das 17.30, participan os alumnos de 2º, 4º e 6º. Os de infantil poderán asistir indistintamente. Non é preciso apuntarse. O xoves 16, día de comadres, realízase un concurso con diferentes categorías (individual e colectivo, tanto de adultos como de nenos). Ao concurso é posible anotarse ata ás 14:30 do mesmo xoves. Ese día pola tarde a partir das 18:30, as persoas que queiran poden correr as comadres e participar na queima colectiva das figuras. Tras a queima convidarase a unha chocolatada.
O venres terá lugar a última charla do ciclo “Desenmascarando o Entroido”. Será ás 20:15 na Casa da Cultura ‘Olga Novo’ a cargo do investigador local, Felipe Castro. Baixo o título “Tres actividades tradicionais e unha mascarada ritual”, Castro centrará a súa charla na celebración do Entroido na parroquia de Salcedo.
Coa fin de semana, chega o evento grande da programación municipal co desfile de Entroido. Na tarde do sábado 18 a partir das 17:00 h, os disfraces, comparsas e carrozas percorrerán as rúas da Pobra do Brollón, acompañados polo charanga RQR. Rematarán na Casa da Cultura coa entrega de premios tanto dos compadres e comadres, como dos participantes no desfile. Para participar no desfile é preciso anotarse antes das 13:30 h do venres 17.
O sábado tamén comeza a programación de Entroido de Salcedo coas funcións de teatro (sábado e domingo ás 22:00h). O domingo ás 17:00 será o pregón, seguido dos disfraces de campo e madamas e danzantes. O Entroido salcedán continúa ata o martes 21, co luns da saída do Oso como evento central.
