A Asociación de Empresarios e comerciantes do Xeoparque Montañas do Courel segue a traballar para ir consolidando a entidade no territorio e vén de presentar outro importante evento para dinamizar o comercio de proximidade. Despois do éxito da campaña de Nadal organizan agora a que será a “1ª Feira de Oportunidades” que se celebrarará os días 11 e 12 de marzo no pavillón municipal de San Clodio, no Concello de Ribas de Sil, colaborador tamén do evento.
“Este ano arrincamos con moita ilusión e con ganas de que a xente poida gozar de todas as ofertas dispoñibles nos diferentes sectores comerciais que presentamos na feira”, din dende a xerencia da entidade.
Os sectores comerciais que estarán representados son: o pequeno electrodoméstico, roupa e calzado, coidado persoal, produtos típicos da zona, agricultura, artesanía e xoiería.
O pavillón estará aberto ao público en horario ininterrompido de 11:00 a 20:00 horas tanto o sábado como o domingo.
