A Banda de Música de Chantada vén de presentar o programa de actuacións que ten programadas para este 2023. Fíxoo da man de dous integrantes da formación: o presidente, Luís Miguel Crespo Caride, e un dos músicos, o trombonista José Antonio García García que estiveron acompañados polo concelleiro de Cultura, Manuel Diéguez.
O concelleiro comezou agradecendo o gran labor que realiza a formación musical cos seus 45 músicos e músicas dirixidos por Carlos Timiraos, e a continuación presentou o cartel da tempada que este ano ábrese coa actuación na XL Feira do Viño de Chantada o vindeiro sábado, 11 de marzo ás 13:00 h. na carpa. No transcurso do acto, o presidente da banda, Luís Miguel Crespo, explicou toda a programación e o motivo de bautizar o cartel deste 2023 como “Sinerxias”. Neste senso, comentou que “o seu nome reflicte a mestura con distintas artes, a identidade a relixión…” e engadiu “a música será a ventá a través da que ver, escoitar e coñecer: a zarzuela, a música antiga, a literatura, Chantada…”.
PROGRAMA DE ACTUACIÓNS
MARZO: “Concerto da XL Feira do Viño de Chantada”.
ABRIL. “Música Sacra do S.XX”. Compositores que se inspiraron na relixión para compoñer. Coa Coral Polifonica de Chantada
MAIO. “Chantada: música e inspiración“. Música inspirada en Chantada, co nome de Chantada ou adicada a xente de aquí.
AGOSTO. “Noites á luz da lúa”. Con Píscore e XXXII Festival de Bandas
OUTUBRO: IX Outono Musical “Unha noite na zarzuela”.
NOVEMBRO: “Os soños na gaiola”. Música e literatura. Música do compositor Antón Alcalde basada en textos de Manuel María.
