A andaina que organizou o 25 de marzo o Concello do Saviñao para conmemorar o 8M foi todo un éxito. Un total de 125 persoas participaron na actividade que as levou a percorrer os case 9 quilómetros que unen a Casa do Concello, en Escairón, coa Praia da Cova.
Baixo o lema “Camiñando pola igualdade”, a expedición –ataviada coas camisolas de cor malva– saía ás 11:00 h. de Escairón e chegaba á Praia da Cova pasadas as 13:00 h. No percorrido, que combinou tramos de camiños de terra con pista asfaltada, a parada máis importante foi a do Miradoiro do Cabo do Mundo, lugar no que se aproveitou para sacar unha foto de grupo e de paso poñer en valor este novo enclave turístico do Concello do Saviñao.
As e os participantes formaron un grupo interxeracional moi animado e ao chegar á Praia da Cova fixeron outra foto de grupo para inmortalizar o momento ao tempo que degustaron un aperitivo xentileza do concello. Dende o equipo de goberno comentan que “están moi satisfeitos co resultado e agradecen a participación”.
